Zeýd bin Sabit

Kyssalar>>Zeýd bin Sabit

Haýsydyr bir baýramçylyk günleriniň biridi. Medinäniň köçeleri täze geýimlerini geýip, birek-biregiň baýramyny gutlamak üçin öýden çykan musulmanlardan doludy. Adamlaryň şatlygy olaryň ýüzüne uran ýalydy, hemmesi nuranady. Her ýerde baýramçylyk joşguny bardy. Çagalaram öz oýunlary bilen başagaýdy.
Gara görnüm ýerden Serwerimiz (sallallahu aleýhi we sellem) göründi. Ol (sallallahu aleýhi we sellem) jagul-da-jugul bolşup, oýnap oturan çagalaryň golaýyna geldi-de, bir diwaryň düýbünde dyz epip, olary synlamaga başlady. Ol (sallallahu aleýhi we sellem) bu eýjejik çagalary ýürekden söýýärdi, olara uly ähmiýet berýärdi. Çünki olar gelejegiň uly adamlarydy, şu günüň ertir üçin beslän arzuwlarydy.
Ol (sallallahu aleýhi we sellem) bir pursatlyk öz çagalygyny ýatlady. Ol wagtlar hemme zat düýbünden başgaçady, adamlar örän gödekdi,doňýürekdi. Gyz çagalary diriligine gömüp, oglanlara «butlaryň guly» manysyny berýän atlary dakardylar.
Serwerimiz (sallallahu aleýhi we sellem) çagalygyndan ýetim galypdy. Atasynyň we agasynyň ýanynda ulalypdy. Mekgä dolanmazyndan öň, ýazlaga çykan günlerini unudyp bilenokdy. Bir eneden süýt emşen dogany bilen dowar bakyp ýörkä: «O dag seňki, bu baýyr meňki» diýşip, özara daglary paýlaşardy.
Ol (sallallahu aleýhi we sellem) näçe ýyl öňki ýatlamalaryndan aýňalyp, oýnap oturan çagalara seretdi-de, ýylgyrdy. Birdenem gözüne başga bir çaga ildi. Şol wagt mübärek kalby jigläp gitdi. Ýüzündäki ýylgyryş zym-zyýat boldy. Ony beýle ýagdaýa salan çaga deň-duşlaryna-da goşulanokdy, oýun hem oýnanokdy. Bir çetde boýnuny burup, gamgyn halda çugutdyrypotyrdy.
Pygamberimiz (sallallahu aleýhi we sellem) ol çaganyň ýanyna baryp, başyny sypady-da:
Balam, saňa näme bolýar? Näme üçin deň-duşlaryňa goşulaňok, olar bilen oýnaňok? – diýip sorady.
Çagajyk kellesini galdyrdy-da, rehimdar Ynsanyň ýüzüne garap:
Kakam söweşde şehit boldy, ejemem kän ýaşaman, meni şu ýagdaýda taşlap, o dünýä gitdi. Men ene-atasyz, ýetim halyma nädip oýnap-güleýin? – diýip jogap berdi. Hezreti Pygamber (sallallahu aleýhi we sellem):
Allahyň Resulynyň kakaň, Aýşäniň ejeň, Fatymanyň doganyň, Hasan we Hüseýiniň hem jigileriň bolmagyny isleýärmiň? – diýip sorady. Muny eşidip,çendenaşa begenen çagajyk:
Onda-da nähili isleýärin, gaty şat bolardym. Beýleki çagalaryň ýanynda-da başymy dik tutup gezerdim,«şeýle hossarlam bar» diýip buýsanardym – diýip jogap berdi. Hezreti Pygamber (sallallahu aleýhi we sellem):
Ýör onda, meniň bilen! – diýip, egni köne eşiklije çaganyň elinden tutup, öýüne getirdi-de, hezreti Aýşe (radyýallahu anha) enemize ýüzlenip:
Bu çaga Allahyň bize ynanan bir amanatydyr. Bu amanataeýe çykyp, ony ynjytmaly däldiris.Mundan beýläk onuň hossarlary bizdiris. Biz oňa hakyky ene-ata bolmalydyrys – diýdi.
Hezreti Aýşe (radyýallahu anha) çagany ýuwundyrdy. Soňam garnyny doýurdy. Açlykdan surnugan çagajyk öňüne goýlanlardan işdämenlik bilen iýip otyrka-da, oňa täzeje eşik getirdi. Köne-küşüllerinden azat bolan çaga begenjinden guş bolup uçaýjak bolýardy. Ol rugsat sorady-da, oýnap oturan çagalaryň ýanyna ýelk ýasady. Emma bu gezek olary gapdaldan synlamady, göni aralaryna goşulşyp, olarbilen oýnamaga başlady.
Beýleki çagalar ondaky bu özgerişlere geň galşyp seredýärdiler, onuň şatlygyny paýlaşýardylar. Beýleki bir tarapdanam oňa gözügidijilik bilen:
Sen nähili bagtly... Allahyň Ilçisi ýaly kakaň, hezreti Aýşe ýaly ejeň, Fatyma ýaly uýaň, Hasan we Hüseýin ýaly-da inileriň bar. Aramyzda iň mübärek maşgaladan bolan sen– diýişdiler. Zeýd olara şeýle jogap berdi:
– Men öz ene-atamy ýitirsem-de, indi has haýyrly ene-ata gowuşdym.
Şeýlelikde, hossarsyz Zeýd mübärek baýram günleriniň birinde mübärek we bagtly maşgalanyň agzasy boldy.
Hawa, diňe imana we pygamber ahlagyna eýe bolnansoň, hossarsyz çagalary mähir bilen bagra basyp, olary söýgi, merhemet bilen kemala getirmek mümkindir. Ýetimiň başyny sypanlaryň we gözýaşlaryny sylanlaryňjennetidiklerini buşlaýan beýik diniň agzalarydygymyzy hiç wagt ýatdan çykarmaly däldiris.